Толиб Каримов

Толиб Каримов (тўлиқ исми Толибжон Рауфович Каримов) 1940-йилда Тошкентда туғилган. 1961-йилда А. Н. Островский номидаги Тошкент театр ва рассомлик институтининг актёрлик факултетини тамомлаган.

Фаолиятини институт йўлланмаси билан Қўқондаги Ҳамза номли театрда бошлаган (1961–1963). У ерда «Ҳасан-Ҳусан», «Олма гуллаганда» ва «Сержант милицияси» спектаклларида рол ўйнаган.

1963-йилдан умрининг охиригача Ҳамза номидаги Ўзбек давлат академик драма театрида (ҳозирги Ўзбек миллий академик драма театри) ишлаган. Қирқдан ортиқ спектаклда бош ролларни ижро этган: Йўлчи («Қутлуғ қон»), Ғофур («Бой ила хизматчи»), Улуғбек («Мирзо Улуғбек»), Шоҳ Маъмун («Абу Райҳон Беруний»), Ҳусайн Бойқаро («Алишер Навоий»), Амир Темур («Соҳибқирон Темур»). Мустақиллик йилларида Саид Барака («Соҳибқирон»), доктор Тавин («Етти фарёд»), Имом («Бир кошона сири») ва Саид Обид («Мирзо Улуғбек») ролларини ижро этган.

Ўзбек телевидениесининг ўттиздан ортиқ лойиҳасида бош ролларда кўринган, «Оталар сўзи — ақлнинг кўзи» кўрсатувида иштирок этган. Кинода «Сайёд қўнғироғи» (1966), «Облава на одичавших собак» (1990), «Бобур» (1990), «Застава» (2007) каби филмларда суратга тушган.

1987-йилда Ўзбекистон ССР халқ артисти унвонига сазовор бўлган, Ҳамза номидаги Ўзбекистон ССР Давлат мукофоти лауреати, 1997-йилда «Меҳнат шуҳрати» ордени билан тақдирланган. 2023-йил 19-июлда Тошкентда 83 ёшида вафот этган.