Vitaliy Denisov

Vitaliy Gennadyevich Denisov 1987-yil 23-fevralda Toshkentda tug'ilgan, o'zbekistonlik va rossiyalik futbolchi, himoyachi. «Paxtakor» bolalar-o'smirlar sport maktabi tarbiyalanuvchisi, futbol ta'limini Moskvaning «Akademika» maktabida tugatib, CSKA ga taklif qilingan (2003). CSKA safida asosiy tarkibda o'ynamagan bo'lsa-da, 2004/05-yilgi UEFA kubogini qo'lga kiritgan jamoa a'zosi bo'lgan va birinchi o'zbekistonlik Yevropa kubogi sohibi bo'lgan; Rossiya kubogi (2004/05, 2005/06) sohibi. 2006-yilda Nijniy Novgorodning «Spartak» klubiga ijaraga berilgan.

2007-yilda Ukrainaning «Dnepr» klubiga o'tib, 2012/13-yil mavsumigacha 160 dan ortiq o'yin o'tkazgan. 2013-yil yanvarida Moskvaning «Lokomotiv» klubi bilan shartnoma imzoladi: Rossiya chempioni (2017/18), Rossiya kubogi sohibi (2014/15, 2016/17); 2013/14-yilgi mavsumda Rossiya Premyer-ligasining eng yaxshi chap himoyachisi deb topilgan, bir necha marta Premyer-liganing 33 ta eng yaxshi futbolchisi ro'yxatiga kiritilgan. 2018-yilda «Krilya Sovetov» (Samara), 2019-yilda «Rubin» (Qozon), 2020-yilda «Rotor» (Volgograd) va «Tom» (Tomsk), 2021-yilda «Baltika» (Kaliningrad) klublarida o'ynagan. 2022-yilda O'zbekistonga qaytib, «So'g'diyona», 2023-yilda AGMK, 2024-yil yanvaridan «Buxoro» klubida o'ynagan.

O'zbekiston terma jamoasida 2006-yil 22-fevralda Bangladeshga qarshi o'yinda (5:0) debyut qilgan; 2007 va 2015-yillardagi Osiyo kubogi turnirlarida to'rttadan o'yinda qatnashgan; 2019-yil yanvariga qadar terma jamoada 72 ta o'yin o'tkazib, bitta gol urgan. 2013-yilda O'zbekistonda yilning eng yaxshi futbolchisi deb topilgan.