Виталий Денисов

Виталий Геннадевич Денисов 1987-йил 23-февралда Тошкентда туғилган, ўзбекистонлик ва россиялик футболчи, ҳимоячи. «Пахтакор» болалар-ўсмирлар спорт мактаби тарбияланувчиси, футбол таълимини Москванинг «Академика» мактабида тугатиб, CSKA га таклиф қилинган (2003). CSKA сафида асосий таркибда ўйнамаган бўлса-да, 2004/05-йилги УЭФА кубогини қўлга киритган жамоа аъзоси бўлган ва биринчи ўзбекистонлик Европа кубоги соҳиби бўлган; Россия кубоги (2004/05, 2005/06) соҳиби. 2006-йилда Нижний Новгороднинг «Спартак» клубига ижарага берилган.

2007-йилда Украинанинг «Днепр» клубига ўтиб, 2012/13-йил мавсумигача 160 дан ортиқ ўйин ўтказган. 2013-йил январида Москванинг «Локомотив» клуби билан шартнома имзолади: Россия чемпиони (2017/18), Россия кубоги соҳиби (2014/15, 2016/17); 2013/14-йилги мавсумда Россия Премьер-лигасининг энг яхши чап ҳимоячиси деб топилган, бир неча марта Премьер-лиганинг 33 та энг яхши футболчиси рўйхатига киритилган. 2018-йилда «Криля Советов» (Самара), 2019-йилда «Рубин» (Қозон), 2020-йилда «Ротор» (Волгоград) ва «Том» (Томск), 2021-йилда «Балтика» (Калининград) клубларида ўйнаган. 2022-йилда Ўзбекистонга қайтиб, «Сўғдиёна», 2023-йилда АГМК, 2024-йил январидан «Бухоро» клубида ўйнаган.

Ўзбекистон терма жамоасида 2006-йил 22-февралда Бангладешга қарши ўйинда (5:0) дебют қилган; 2007 ва 2015-йиллардаги Осиё кубоги турнирларида тўрттадан ўйинда қатнашган; 2019-йил январига қадар терма жамоада 72 та ўйин ўтказиб, битта гол урган. 2013-йилда Ўзбекистонда йилнинг энг яхши футболчиси деб топилган.