Xurshid Davron

Xurshid Davron 1952-yil 20-yanvarda Samarqand viloyatining Samarqand tumanidagi Chordara qishlog'ida, xizmatchi oilasida tug'ilgan. Ba'zi manbalarda ona tomondan u Naqshbandiya tariqatining yirik namoyandasi Maxdumi A'zam avlodlaridan ekani aytiladi.

Maktabni bitirgach, 1969-yilda Toshkent davlat universiteti jurnalistika fakultetining kechki bo'limiga kirgan va kunduzi Toshkentdagi qurilishlarda ishlagan. 1971–1973-yillarda harbiy xizmatni o'tagan, so'ng o'qishni davom ettirib, universitetni 1977-yilda tamomlagan. 1974–1989-yillarda «Yosh gvardiya» nashriyotida muharrir va tahririyat mudiri, 1989–1991-yillarda «Kamalak» nashriyotida direktor o'rinbosari va direktor bo'lgan.

Dastlabki she'rlari 1976–1977-yillardan tuman va viloyat gazetalarida bosilgan. 1979-yilda «Qadrdon quyosh» va «Shahardagi olma daraxti» to'plamlari chiqqan; keyin «Tungi bog'lar» (1981), «Uchib boraman qushlar bilan» (1983), «To'marisning ko'zlari» (1984), «Bolalikning ovozi» (1986), «Qaqnus» (1987) va «Bahordan bir kun oldin» (1997) kitoblari nashr etilgan. Yozuvchilar uyushmasi a'zosi (1979-yildan).

1990-yillarda u asosan nasrda ishlagan: «Samarqand xayoli» (1991), «Sohibqiron nabirasi» (1995) va Najmiddin Kubro hayotiga bag'ishlangan «Shahidlar shohi» (1998) tarixiy qissalarini yozgan. Dramaturg sifatida Bobur va Mirzo Ulug'bek haqida pyesalar yaratgan. Yapon, rus, latish she'riyatidan, jumladan «Dengiz yaproqlari» (1988) va «Qirq oshiq daftari» (1989) to'plamlarini o'zbek tiliga tarjima qilgan. «Temurnoma» teleserialining (1996), Parijdagi «Odeon» teatrida qo'yilgan «Buyuk ipak yo'li» musiqiy tomoshasining (1997) stsenariysi muallifi.

1994–1996-yillarda Respublika «Ma'naviyat va ma'rifat» markazi raisining o'rinbosari, 1996-yildan O'zbekiston Milliy teleradiokompaniyasida rahbar lavozimlarda ishlagan; «Yoshlar» telekanalining bosh direktori bo'lgan (1998–2005). 2000–2004-yillarda Oliy Majlis deputati.

1997-yilda «Do'stlik» ordeni, 1999-yilda «O'zbekiston xalq shoiri» faxriy unvoni berilgan. Mahmud Koshg'ariy nomidagi xalqaro mukofot (1989), xalqaro «Oltin qalam» mukofoti (2009), Ozarbayjonning Mikoyil Mushfiq mukofoti (2013) va Turkiyaning Niyoziy Misriy nomidagi mukofoti (2022) laureati. She'rlari qirqdan ortiq tilga tarjima qilingan.