Анвар Эргашев

Анвар Йўлдошевич Эргашев 1954-йил 19-апрелда дирижёр оиласида туғилган, Фарғонада ўсган. Тошкент давлат консерваториясини пианино (1977), композиция (1986) ва опера-симфоник дирижёрлик (1994) бўйича тамомлаган.

Ўқитувчи, вазирлик ходими, Тошкент маданият институтида педагог бўлиб ишлаган, Навоий номидаги театр ва Ўзбекистон миллий симфоник оркестрида дирижёрлик лавозимларида бўлган.

200 дан ортиқ асар, жумладан симфоник ва камер асарлар, иккита пианино контсерти, пианино трио ёзган. 50 дан ортиқ филм учун мусиқа басталаган («Осмондаги болалар», «Бомба», «Уч қиролнинг жанги», «Шариф ва Маъриф» ва бошқалар). Саҳна асарлари: «Крошка» опереттаси, «Ҳумо» (2005) ва «Чеховиана» (2005–2010) балетлари; болалар учун «12 ой», «Қор маликаси» каби янги йил мусиқали эртаклари.

2000-йилда «Офарин» мукофотининг «Йилнинг энг яхши бастакори» номинацияси ғолиби, 2002-йилда Ўзбекистон хизмат кўрсатган артисти, 2007-йилда «Ҳумо» мусиқаси учун I даражали давлат мукофоти лауреати. 2020-йил 8-августда Тошкентда вафот этган.