Фарида Афрўз

Фарида Афрўз (асл исми Фарида Қўзиевна Бўтаева) 1956-йил 5-мартда Фарғона водийсида, Қўқон шаҳрида туғилган. Қўқондаги 10-мактабда ўқиган; биринчи шеърини бешинчи синфда ёзган, у ўша йиллари «Ленин учқуни» газетасида босилган. Мактаб йилларида шаҳар адабий давраларида, танлов ва олимпиадаларда шеърлари билан қатнашган.

Муқимий номидаги Қўқон давлат педагогика институтида ўқиган (1970-йиллар). Меҳнат фаолиятини Қўқон адабиёт музейида бошлаган, сўнг Фарғона санъат билим юртида ўқитувчи, Бағдод туманидаги «Авангард» газетасида адабий ходим, Учкўприк туманидаги «Истеъдод» ижодкор ёшлар уюшмасининг раиси бўлган. Кейинчалик «Маънавият ва маърифат» жамоатчилик маркази ҳузуридаги «Шуур» ижодий корхонасини бошқарган, Адлия вазирлигининг «Ҳаёт ва Қонун» журналида бош муҳаррир ўринбосари, Ғафур Ғулом номидаги Адабиёт ва санъат нашриётида санъат бўлими бошлиғи, «Ёзувчи» нашриётида бош муҳаррир бўлиб ишлаган.

1994-йилдан Ўзбекистон Ёзувчилар уюшмаси аъзоси. Биринчи шеърий тўплами «Қирқ кокиллигим» 1986-йилда чиққан; ундан кейин «Изтироб кўйлаги» (1992), «Тунлар исёни» (1994), «Кўзим маним...» (1999), «Ўзимдан ўзимгача» (2001), «Ушшоқ» (2004), «Тасбиҳ» (2006) ва «Ўша кун бугундир» (2012) китоблари нашр этилган. 2000-йилда «Қурбонжон додхоҳ» тарихий драмасини ёзган; шеърлари аудио китоб сифатида ҳам чиққан.

Шеърлари рус, турк, инглиз, немис, франсуз, форс, уйғур, озарбайжон, гагауз, хитой, корейс тилларига таржима қилинган. Ўзи ҳам таржима билан шуғулланган: турк шоирлари Зиё Кўкалп, Исмат Ўзал ва бошқаларнинг шеърларини, форс, қозоқ ва қорақалпоқ шеърияти намуналарини, Дейл Карнеги асарларини ўзбек тилига ўгирган.

«Афрўз рекордс» овоз ёзиш студиясининг бош директори. 2020-йилда Ўзбекистон Олий Мажлиси Қонунчилик палатасининг депутати бўлган ва фан, таълим, маданият ва спорт масалалари қўмитасида ишлаган; 2024-йил декабрида Ўзбекистон Ёзувчилар уюшмаси раисининг ўринбосари этиб тайинланган.

1999-йилда «Шуҳрат» медали, 2001-йилда «Ўзбекистон мустақиллигининг 10 йиллиги» кўкрак нишони, 2017-йилда «Дўстлик» ордени билан тақдирланган; 2025-йилда унга Ўзбекистонда хизмат кўрсатган маданият ходими унвони берилган.