Жуманиёз Жабборов

Жуманиёз Жабборов 1930-йил 25-октабрда Қашқадарё вилоятининг Косон туманидаги Пўлоти қишлоғида хизматчи оиласида туғилган. Матбуотда 1950-йилдан чиқа бошлаган. 1952-йилда Тошкент давлат университетининг филология факултетини тугатган, 1952–1953-йилларда Москвадаги Олий адабиёт курсларида ўқиган.

Меҳнат фаолиятини 1953-йилда «Шарқ юлдузи» журналида бошлаган: аввал бўлим мудири, сўнг масъул котиб бўлган (1953–1962). 1962–1964-йилларда «Гулхан» журналида бош муҳаррир, 1964–1976-йилларда «Совет Ўзбекистони» газетасида (ҳозирги «Ўзбекистон овози») бўлим мудири ва бош муҳаррир ўринбосари бўлиб ишлаган. 1976–1981-йилларда маъмурий идорада бўлим мудири, 1981–1985-йилларда Ғафур Ғулом номидаги Адабиёт ва санъат нашриётининг директори бўлган.

Биринчи тўплами «Баҳор нафаси» 1956-йилда нашр этилган. Кейинчалик «Мақсад йўлида», «Илҳом дақиқалари», «Эътиқод», «Ажаб дунё – севги дунёси» каби шеърий китоблари, «Гулшан», «Тоғлар садоси», «Таллимаржон достони» сингари достонлари чоп этилган. «Ўжарлар», «Йиллар ўтиб…», «Тўйдан олдин томоша» драмалари Муқимий номидаги мусиқали театрда ва вилоят театрларида саҳналаштирилган. 1998-йилда «Ал-Фарғоний» операсининг либреттосини ёзган.

Жабборов таржимон сифатида Ҳофиз Шерозий, Убайд Зоконий, Байрон, Лермонтов, Блок шеърларини ва Рабиндранат Тагорнинг «Қурбонлик» драмасини ўзбек тилига ўгирган. 1985–1990-йилларда Ўзбекистон Ёзувчилар уюшмасида таржима кенгаши маслаҳатчиси, 1990–2005-йилларда Вазирлар Маҳкамаси ҳузуридаги адабиёт, санъат ва меъморчилик соҳасидаги Давлат мукофотлари қўмитасининг масъул котиби бўлган.

1980-йилда унга Ўзбекистон ССР хизмат кўрсатган санъат арбоби, 1997-йилда Ўзбекистон халқ шоири унвони берилган; «Шуҳрат» медали билан тақдирланган. 2010-йил 13-декабрда Тошкентда 80 ёшида вафот этган. 2021-йил августида вафотидан кейин «Меҳнат шуҳрати» ордени билан мукофотланган. 2020-йилда Алишер Навоий номидаги Миллий кутубхонада унинг 90 йиллигига бағишланган кеча ўтказилган.