Неъмат Аминов

Неъмат Аминов 1937-йил 17-июлда Бухоро вилояти Ромитан туманидаги Питмон қишлоғида темирчи оиласида туғилган. 1954–1959-йилларда Файзулла Хўжаев номидаги Бухоро педагогика институтининг тарих-филология факултетида ўқиган.

Меҳнат фаолиятини Бухоро радиоэшиттириш қўмитасида бошлаган: 1961–1973-йилларда вилоят радиоэшиттириш қўмитасида муҳаррир ва бош муҳаррир бўлган. Биринчи ҳажвий ҳикоялар тўплами — «Икки пуллик обрў» 1966-йилда нашр этилган.

1973-йилда Тошкентга кўчиб, «Муштум» ҳажвий журналида ишлаган: аввал масъул котиб, кейин бош муҳаррир бўлган ва 1995-йилгача журналда хизмат қилган. 1989–1991-йилларда «Шарқ юлдузи» журнали бош муҳаррирининг ўринбосари, 1995–1999-йилларда республика «Маънавият ва маърифат» жамоатчилик марказининг раҳбари бўлган.

Аминов ҳажвий ҳикоя ва қиссалар муаллифи. «Қирқ учинчи почча» (1970), «Лабиҳовуз хандалари» (1973), «Чинорлар қўшиғи» (1984), «Елкасиз полвон» (1986), «Ўғри мушукча» (1987), «Қаҳқаҳа» (1987), «Яллама-ёрим» (1988), «Чолболанинг эртаклари» (1990) каби тўпламлари чоп этилган. 1976–1983-йилларда «Елвизак» ва «Суварак» қиссалари асосида «Ёлғончи фаришталар» ҳажвий романини ёзган; «Бир аср ҳикояти» (1996) асарида халқона руҳ яққол кўзга ташланади. Ҳикоялари бир қанча хорижий тилларга таржима қилинган.

1992-йилда унга «Ўзбекистон халқ ёзувчиси» унвони берилган, 1999-йилда «Меҳнат шуҳрати» ордени билан мукофотланган. Неъмат Аминов 2005-йил 18-октабрда Тошкентда вафот этган; 2021-йилда вафотидан кейин «Фидокорона хизматлари учун» ордени билан тақдирланган.