Сойиб Хўжаев

Сойиб Хўжаев 1910-йил 5-декабрда Андижон вилоятининг Хонобод қишлоғида (ҳозир шаҳар) туғилган. Саҳнадаги ишини 1927-йилда Қўқондаги Ҳамза номидаги театрда бошлаган, 1928–1939-йилларда Андижон театрида ишлаган. Бу ерда у Готстсининг «Маликайи Турандот»ида Труффалдино, Гоголнинг «Ревизор»ида Бобчинский, Ҳамзанинг «Бой ила хизматчи»сида Холмат ролларини ижро этган.

1939-йилда Хўжаевга Ўзбекистон ССР халқ артисти унвони берилган ва шу йили у Тошкентга кўчиб, ўша йилларда ташкил этилган Муқимий номидаги ўзбек мусиқали драма ва комедия театрига ўтган. Умрининг охиригача шу театрда ишлаб, 1982-йилгача саҳнада ўйнаган. Драматургиядан Ҳамзанинг «Майсаранинг иши»да Мулладўст, Комил Яшин ва Тўхтасин Жалиловнинг «Нурхон»ида Ҳузурхўжа, Котляревскийнинг «Наталка Полтавка»сида Микола, Шекспирнинг «Ўн иккинчи кеча»сида Сер Тоби, «Ажаб савдолар»да Вакил қассоб ролларини яратган.

Энг машҳур роли Ҳамид Ғулом ва Манас Лиевнинг «Тошболта ошиқ» спектаклидаги Тошболта бўлган — манбаларга кўра, бу ролни 1500 мартага яқин ижро этган. У халқ қизиқчилари анъанасини давом эттирган комик актёр сифатида танилган: саҳнада ҳажв, мутойиба, мимика ва андижон шевасидаги сўз ўйинларидан фойдаланган.

Кинода асосан эпизодик ва иккинчи даражали, баъзан бош ролларни ўйнаган. Айниқса 1964-йилдаги «Ёр-ёр» (рус тилида «Где тй, моя Зулфия?») комедиясидаги Аҳмаджон роли (ўғли ролида Бахтиёр Ихтиёров) ва «Еттинчи жин» (1976) телефилмидаги Хон роли эсда қолган. Шунингдек «Мафтунигман», «Плюс единитса», «Шижоат», «Ажойиб хаёлпараст», «Чинор тагидаги дуэл» каби филмларда суратга тушган, телевидение ва радио кўрсатувларида қатнашган.

Сойиб Хўжаев 1982-йил 3-майда вафот этган ва Тошкентдаги Чиғатой қабристонига дафн этилган. У Меҳнат Қизил Байроқ ордени билан тақдирланган, вафотидан кейин, 2003-йилда, «Буюк хизматлари учун» ордени берилган. 2010-йилда унинг таваллудининг 100 йиллигига почта маркаси чиқарилган, 1999-йилда унинг хотирасига бағишланган «Сойибхўжа операцияси» спектакли саҳналаштирилган.