Тоҳир Қаҳҳор

Тоҳир Қаҳҳор — шоир, таржимон, адабиётшунос ва журналист. У 1953-йил 9-майда Наманган вилояти Тўрақўрғон туманидаги Мозор Қўҳна қишлоғида хизматчи оиласида туғилган. Дастлабки шеъри 1968-йилда туман газетасида босилган.

1970–1975-йилларда Тошкент давлат университети (ҳозирги Ўзбекистон Миллий университети) журналистика факултетида ўқиган. Кейин Ўзбекистон радиосининг адабий-драматик эшиттиришлар бош таҳририятида (1975–1979), сўнг «Шарқ юлдузи» журналида адабий ходим ва наср бўлими мудири бўлиб ишлаган (1979–1991). Бу йилларда журналда «Тарихимиздан лавҳалар» ва «Жаҳон ҳикоячилиги хазинасидан» рукнлари йўлга қўйилган. 1991–1997-йилларда Ғафур Ғулом номидаги Адабиёт ва санъат нашриётида хизмат қилган.

Биринчи илмий мақоласи 1978-йилда «Таржима санъати» тўпламида чоп этилган. «Оқ ўрик» (1980), «Оқаётган дарё» (1982), «Осмон кимники» (1982), «Эшик тақиллаётир» (1984), «Кун кўзи» (1987), «Юлдузлар менинг боғим» (1988), «Тоғнинг парвози» (1990) номли шеърий тўпламлари нашр этилган; 1990-йилда Москвада рус тилида «Око дня» китоби чиққан. Мустақиллик мавзусидаги мақолалари «Ҳур Туркистон учун» (1994) китобига жамланган.

Тоҳир Қаҳҳор таржимон сифатида ҳам танилган: Габриэл Гарсиа Маркеснинг «Ошкора қотиллик қиссаси»ни ўзбекчага ўгирган, турк адабиётидан Зиё Кўкалп, Ниҳол Отсиз, Дундар Алп ва Исмоил Гаспирали асарларини, форс классикларидан Ҳофиз Шерозий ва Жомий ғазалларини таржима қилган. Туркияда 1995-йилда чоп этилган замонавий ўзбек шеърияти антологиясининг тузувчиларидан бири. 2004-йилда «20–30-йиллар ўзбек адабиётининг Туркияда ўрганилиши» мавзусида номзодлик диссертациясини ҳимоя қилган. 2005–2010-йилларда Жаҳон тиллари университетининг халқаро журналистика факултетида дарс берган, 2010–2012-йилларда «Жаҳон адабиёти» журналида бўлим муҳаррири бўлган.

1991-йилда унга Ўзбекистонда хизмат кўрсатган маданият ходими унвони берилган; ўша йили мустақиллик мавзусидаги публитсистик ва адабий-илмий мақолалари учун Ўзбекистон Ёзувчилар уюшмаси ва Тарғибот марказининг Аҳмад Яссавий номидаги халқаро мукофотига сазовор бўлган. Шеърлари озарбайжон, украин, инглиз, болгар ва турк тилларига таржима қилинган. Ўзбекистон Ёзувчилар уюшмаси аъзоси.