Ёрмат Тожиев

Ёрмат Тожиев 1940-йилда Фарғона вилояти Бешариқ туманидаги Рафқон қишлоғида туғилган. 1962-йилда Тошкент давлат университетининг (ҳозирги Ўзбекистон Миллий университети) филология факултетига ўқишга қабул қилинган ва ўқишни тугатгач, шу университетда меҳнат фаолиятини бошлаган.

1967-йилдан ўзбек тилшунослиги кафедрасида ўқитувчи, доцент, профессор, кафедра мудири лавозимларида ишлаган; ҳозир ҳам шу кафедранинг профессори. Кафедрани ўзбек тилшунослигининг асосчиларидан бири Айюб Ғуломов бошқарган, Тожиев эса унинг шогирди бўлган.

1974-йилда Айюб Ғуломов раҳбарлигида «Эга эканлик ва эга эмаслик маъноларини ифодаловчи аффикслар синонимияси» мавзусида номзодлик диссертациясини ҳимоя қилган. 1992-йилда «Ўзбек тилида аффиксал синонимия» мавзусидаги докторлик диссертацияси билан филология фанлари доктори илмий даражасини олган.

Унинг тадқиқотлари сўз, ўзак ва негиз муносабатлари, ўзак морфемаларнинг фонетик тузилиши, аффикс морфемалар ва уларнинг ҳосил бўлиши, шакл ҳосил қилувчи морфемалар, аффиксларнинг кўп маънолилиги, омонимияси ва синонимиясига бағишланган. Таржимаи ҳолида 10 дан ортиқ монография ва ўқув қўлланма, 20 дан ортиқ дастур ва ишланма, 100 дан ортиқ илмий мақола келтирилган.

Унинг илмий раҳбарлигида бир неча фан доктори ва ўндан ортиқ фан номзоди диссертация ҳимоя қилган; 30 дан ортиқ диссертация муаллифининг расмий оппоненти бўлган. Ўзбекистонда хизмат кўрсатган халқ таълими ходими унвонига сазовор бўлган. 2020-йилда Ўзбекистон Миллий университетида унинг 80 йиллигига бағишлаб «Филологик таълимни такомиллаштириш муаммолари» республика илмий-амалий анжумани ўтказилган.