Чўлпон

Абдулҳамид Сулаймон ўғли Юнусов (Чўлпон тахаллуси билан танилган) 1897-йилда Андижонда туғилган. Аввал мадрасада (1908–1912), сўнг рус-тузем мактабида (1912–1914) ўқиган; Шарқ мумтоз шоирлари асарларини мутолаа қилиш ва жадид матбуотини кузатиш орқали ўз билимини оширган.

1914-йилда Тошкентга келиб, «Садои Туркистон» газетаси билан ҳамкорлик қилган. Шу йили газетада унинг «Туркистонли қардошларимизга» шеъри, «Қурбони жаҳолат» ва «Дўхтур Муҳаммадёр» ҳикоялари ҳамда «Адабиёт надир?» ва «Муҳтарам ёзғувчиларимизга» мақолалари босилган. Тошкентда Мунаввар Қори Абдурашидхонов ва Убайдулла Хўжаев билан танишуви унинг миллий уйғониш ҳаракати вакили сифатида шаклланишида муҳим бўлган.

1917-йил Феврал инқилобидан сўнг Туркистон мухторияти ҳукуматининг барпо этилишида фаол қатнашган; мухториятни шарафловчи «Озод турк байрами» шеъри ўзбек давлатчилиги тарихидаги илк мадҳия сифатида эътироф этилади. З. Валидий билан бирга Оренбургга бориб, Бошқирдистон мухторияти ҳукуматини ташкил этишда ҳам иштирок этган.

Мухторият тугатилгач, «Илмий кенгаш», «Чиғатой гурунги», «Нашри маориф» ташкилотлари ва «Турон» театрида ишлаган. 1919–1923-йилларда «Янги Шарқ» ва «Иштирокиюн» (кейинроқ «Қизил байроқ», сўнг «Туркистон») газеталарида адабий ходим, 1920–1923-йилларда Халқ маориф комиссарлиги қошидаги Илмий кенгашда раис, 1921–1922-йилларда «Бухоро ахбори» газетасида муҳаррир, «Турон» театрида директор, 1922–1923-йилларда «Муштум» журнали ва «Дархон» газетасида техник муҳаррир ва адабий ходим бўлган.

1924–1927-йилларда Москвадаги Ўзбек драма студиясида, 1927–1931-йилларда Ўзбек давлат драма театрида адабий ходим бўлган. 1931–1934-йилларда Москвада СССР Марказий Ижроия Қўмитаси ва Шарқ халқлари марказий нашриётида таржимон бўлиб ишлаган; 1935–1937-йилларда «Муштум» ва «Гулистон» журналлари ҳамда «Театру» газетасида жамоатчилик асосида адабий ходим бўлган. 1927-йилдан кейин унга қарши бошланган кураш уни 1931–1935-йилларда Москвада яшашга мажбур қилган.

Чўлпоннинг шеърлари «Уйғониш» (1922), «Булоқлар» (1923), «Тонг сирлари» (1926) ва «Соз» (1935) тўпламларида жамланган. Унинг шеърияти соф лирика ва ижтимоий-сиёсий лирикага бўлинади; «Гўзал», «Сезги», «Сирлардан», «Мен шоирми?» каби шеърлари билан бармоқ вазнидаги янги ўзбек шеъриятини юксак босқичга кўтарган. «Ойдин кечаларда», «Қор қўйнида лола», «Новвой қиз» ҳикоялари ўзбек адабиётидаги лирик насрнинг дастлабки намуналаридандир. 1936-йилда нашр этилган «Кеча ва кундуз» романи унинг ижодининг чўққиси ҳисобланади ва ўзбек романчилиги анъаналарининг шаклланишига катта таъсир кўрсатган.

Чўлпон драматург ва таржимон сифатида ҳам ишлаган: «Ёрқиной», «Муштумзўр», «Ҳужум», «Ўртоқ Қаршибоев» каби песалар ёзган, Пушкиннинг «Борис Годунов» ва «Дубровский», Горкийнинг «Она», Шекспирнинг «Ҳамлет», Гоголнинг «Терговчи» асарларини ўзбек тилига ўгирган.

1937-йил 14-июлда қамоққа олинган ва 1938-йил октабрда Тошкентда, Бўзсув бўйидаги қатлгоҳда отиб ташланган. Унинг кўплаб қўлёзмалари йўқ бўлган; бизгача 10 жилд ҳажмдаги оригинал ва таржима асарлари етиб келган. 1956-йилда вафотидан кейин оқланган, 1980-йилларнинг охиридан асарлари қайта нашр этила бошлаган.

1991-йилда Чўлпонга Алишер Навоий номидаги Давлат мукофоти, 1999-йилда «Мустақиллик» ордени берилган (иккаласи вафотидан кейин). 1997-йилда Ўзбекистон Президенти фармони билан унинг 100 йиллиги кенг нишонланган; Андижонда уй-музейи ташкил этилган, Тошкентда ёдгорлик музейи ва ҳайкал (ҳайкалтарош Жалолиддин Миртожиев) ўрнатилган, мамлакатнинг йирик нашриёти унинг номи билан аталади. 1997–2000-йилларда адибнинг «Тўла асарлар тўплами» нашр этилган; танланган асарлари 2009-йилда Москвада рус тилида, «Кеча ва кундуз» романи эса Франсияда франсуз тилида чоп этилган.