Домла Ҳалим Ибодов

Домла Ҳалим Ибодов Бухорода тўқувчи оиласида туғилган ва Бухоро шашмақом ижрочилик мактабининг йирик вакилларидан бири бўлган. Ўн ёшидан хонанда ва созанда Уста Шарофдан доира чалишни ўрганган, устози уни шашмақом намуналари билан таништириб, машҳур ижрочилар Ота Жалол ва Ота Ғиёс билан учраштирган.

Ҳали йигирмага етмай Бухорода танилган хонанда бўлиб, ўзи ҳам шогирд тайёрлаган. 1923-йилда Москвадаги биринчи қишлоқ хўжалик кўргазмасига Юсуфжон қизиқ Шакаржонов, Мулла Тўйчи Тошмуҳаммедов, Ғулом Зафарий ва бошқа санъаткорлар билан бирга борган ва чиқишлари катта қизиқиш уйғотган.

Самарқандда мусиқа ва хореография институти 1928-йилда очилганда у ерга таклиф қилинган; мусиқашунос Н. Н. Миронов ундан шашмақомнинг кўплаб намуналарини ёзиб олган. Самарқандда Ҳожи Абдулазиз Абдурасулов билан бирга кўплаб концертларда қатнашган.

1931-йилдан Ўзбекистон радиосида хонандалик қилган. «Савти Сарвиноз», «Қашқарчаи ушшоқ», «Ироқ», «Насруллои», «Мўғулчаи дугоҳ», «Тўлқин», «Наврўзи Сабо» каби ижролари радионинг олтин фондига киритилган. 1933–1934-йиллар давомида мусиқашунос Й. Э. Романовская унинг ижросидаги бир қанча куй ва йўлларни нотага олган.

Ибодов 1932-йилда республика санъат қурултойида, 1936-йилда санъаткорларнинг биринчи республика конференциясида ва 1937-йилда Москвадаги ўзбек санъати декадасида иштирок этган. Юнус Ражабий, Мухтор Ашрафий, Толибжон Содиқов, Мардон Насимов ва бошқалар унинг шогирдлари қаторига киради; ўғли Олимжон Ҳалимов кейинчалик халқ артисти ва бастакор бўлди.

Хизматлари учун «Ўзбекистон ССР халқ ҳофизи» унвонига сазовор бўлган. 1940-йилда вафот этган; Бухородаги санъат билим юрти унинг номи билан юритилади.