Маъмура Эргашева

Маъмура Зокиржоновна Эргашева 1951-йил 25-январда Тошкентда туғилган. Ўзбек раққосаси ва балетмейстери. 1969-йилда Тошкент хореография билим юртини тамомлаган, сўнг Тошкент чет тиллар институтининг франсуз тили бўлимида ўқиб, уни 1977-йилда битирган.

1969-йилдан «Баҳор» рақс ансамблида раққоса ва балетмейстер сифатида ишлаган; 1990-йилдан ансамблнинг бадиий раҳбари бўлган. «Баҳор»нинг асосчиси Мукаррам Турғунбоева ўз мактабини яратган устоз ҳисобланади, Эргашева ҳам ундан ўрганган раққосалар қаторига киради.

Унинг репертуаридан ўзбек мумтоз ва замонавий рақслари — «Муножот», «Ларзон», «Лазги», «Танавор», «Фарғона рубоийси», «Роҳат», «Пилла», «Гулсара», «Нозанин» ва бошқалар ўрин олган. Шунингдек, жаҳон халқларининг рақсларини — арабча, японча, испанча, кубача, эронча ва афғонча рақсларни ижро этган.

Балетмейстер сифатида «Наврўзи ажам», «Фиғонким», «Сумалак», «Ўзбекистон маконим», «Тавоис», «Баҳор нашидаси» каби рақсларни саҳналаштирган. Наврўз ва Мустақиллик каби республикадаги йирик байрамларда бош балетмейстер бўлиб иштирок этган.

1979-йилда театр арбоблари уюшмасига аъзо бўлган. 1983-йилда Ўзбекистон ССР халқ артисти унвони берилган. 1985-йилда «Ўзбектелефилм» унинг ижодига «Маъмура Эргашева рақсга тушади» номли видеофилм бағишлаган. 1998-йилда «Шуҳрат» медали, 1999-йилда «Меҳнат шуҳрати» ордени билан тақдирланган.