Рейнголд Глиэр

Рейнголд Моритсевич Глиэр 1874-йил 30-декабрда (янги услубда 1875-йил 11-январда) Киевда туғилган. Отаси Саксониядаги Клингентал шаҳрчасидан Киевга кўчиб келган мис пуфлама чолғулар устаси, онаси Юзефа Корчак эди. Дастлабки мусиқий билимни уйда, скрипка дарсларида олган ва 1894-йилда Киев мусиқа билим юртини тугатган.

Шу йили Москва консерваториясига ўқишга кириб, аввал скрипка (Н. Соколовский, сўнг Й. Гржимали) синфида таҳсил олган. 1900-йилда консерваторияни тамомлаган: полифонияни С. Танеевдан, гармонияни А. Аренский ва Г. Конюсдан ўрганган, композицияни М. Ипполитов-Иванов синфида ўқиган. 1900-йилдан Гнесинлар мусиқа билим юртида назарий фанлардан дарс берган; 1902–1903-йилларда Н. Мясковский ва С. Прокофевга хусусий дарслар ўтган. 1905, 1912 ва 1914-йилларда М. Глинка номидаги мукофотга сазовор бўлган (Биринчи секстет, «Сиреналар» поэмаси ва Учинчи симфония «Иля Мурометс» учун). 1906–1908-йилларда Германияда О. Фриднинг дирижёрлик дарсларини олиб, 1908-йилдан асосан ўз асарларини ижро этиб дирижёр сифатида чиқиш қилган.

1913–1920-йилларда Киев консерваториясида профессор (1914-йилдан директор) бўлган, шогирдлари орасида Б. Лятошинский ва Л. Ревутский бор. 1920–1941-йилларда Москва консерваториясида композиция профессори эди. 1923-йилда Озарбайжон ССР Халқ маориф комиссарлиги уни Бокуга таклиф қилиб, миллий мавзуда опера ёзишни сўраган; бу сафар «Шоҳсанам» операсининг (1927-йилда Бокуда саҳналаштирилган) яратилишига олиб келган. 1926–1927-йилларда ёзилган «Лолақизғалдоқ» балети замонавий мавзудаги дастлабки совет балетларидан бири бўлди.

1930-йилларда Глиэр ўзбек мусиқасига мурожаат қилди. 1936-йилда Тошкентда К. Яшин ва М. Муҳамедов матнига ёзилган «Гулсара» мусиқали драмаси саҳналаштирилди; Глиэр уни Т. Жалилов ва Т. Содиқов билан ҳамкорликда, халқ куйлари асосида яратган. 1937-йил баҳорида Москвада ўзбек санъати декадаси ўтди, 31-майда ўзбек мусиқа ва рақс санъатини ривожлантиришдаги хизматлари учун Глиэрга Меҳнат Қизил Байроқ ордени берилди, ўша йили унга Ўзбекистон ССР халқ артисти унвони ҳам берилган. 1937-йилда рус, украин, озарбайжон ва ўзбек куйларига қурилган «Тантанали увертюра»ни, 1940-йилда ўзбек халқ мусиқасини ўрганиш самараси — «Фарғонача байрам» увертюрасини ёзган. 1940-йилда Навоий достони асосидаги «Лайли ва Мажнун» операсини (Хуршид либреттоси), 1949-йилда «Гулсара»нинг опера вариантини Т. Содиқов билан бирга яратган; Содиқов Москва консерваториясида Глиэр синфида ўқиган. Глиэр шунингдек «Алишер Навоий» филмига (1947) Содиқов билан бирга мусиқа ёзган.

1938-йилда унга СССР халқ артисти унвони берилган (17-апрел), ўша йили Москва бастакорлар уюшмасига раҳбарлик қилган, 1939–1948-йилларда эса Совет бастакорлари уюшмаси ташкилий қўмитасининг раиси бўлган. 1941-йилда санъатшунослик доктори даражасини олган. Кейинги йилларда колоратура сопрано ва оркестр учун контсерт (1943), Тўртинчи торли квартет (1946) ва «Бронза чавандоз» балети (1949) яратган: шу уч асари учун 1946, 1948 ва 1950-йилларда биринчи даражали Сталин мукофотини олган. Балетдаги «Буюк шаҳарга мадҳия» кейинчалик Ленинград мадҳияси бўлган. Уч марта (1945, 1950, 1955) Ленин ордени билан тақдирланган.

Глиэр 1956-йил 23-июнда Москвада вафот этган ва Новодевиче қабристонида (3-участка) дафн этилган. Ҳайкалтарош М. Аникушин ишлаган ёдгорлик вафотининг бешинчи йиллигида, 1961-йил 23-июнда очилган. Унинг номини Киевдаги мусиқа академияси, Москва, Калининград, Тошкент, Алмати ва Нукусдаги болалар мусиқа мактаблари олиб юради; Ўзбекистон миллий энсиклопедиясига кўра, Тошкентдаги республика ўрта махсус мусиқа интернат мактаби ҳам унинг номига қўйилган.