Шукур Саъдулла

Шукур Саъдулла 1912-йил 15-январда Жиззахнинг Тошкентлик маҳалласида хизматчи оиласида туғилган. Етти ёшида маҳалладаги эски мактабга бориб, тез савод чиқарган, сўнг шаҳарда янги очилган Наримонов номидаги мактабда ўқиган. Ўн икки ёшида мактабни тугатиб, 1924-йилда ўқишни давом эттириш учун Самарқандга йўл олган.

1924–1929-йилларда Самарқанд педагогика билим юртида таҳсил олган ва шу ерда шеър ёзишга жиддий киришган. Дастлабки шеърлари асосан катталарга мўлжалланган, даврнинг ижтимоий-сиёсий воқеаларига бағишланган эди. 1929-йил бошида Самарқандда болалар адабиёти ҳақида кенгаш ўтказилган; шундан кейин у ҳам Зафар Диёр, Илёс Муслим, Султон Жўра сингари болалар учун ёза бошлаган. 1929–1931-йилларда Педагогика академиясининг филология факултетида ўқиган.

1931-йилда Ўзбекистон давлат нашриётининг болалар ва ёшлар адабиёти бўлимига муҳаррир бўлиб ишга таклиф қилинган ва нашриётда 1964-йилгача ишлаган. Ўша йилларда хотин-қизлар педагогика билим юртидаги адабиёт тўгарагига раҳбарлик қилганлардан бири бўлган: тўгарак аъзоси Зулфиянинг биринчи шеъри «Мен иш қизи» 1931-йил 17-июлда унинг воситасида «Ишчи» газетасида босилган. Ўзининг биринчи тўплами «Ҳайқириқ» 1932-йилда Тошкентда чиққан; унга ўн бир шеър ва битта кичик поэма кирган.

1938-йилда ўзбек халқ эртаклари сюжети асосида «Ёрилтош» мусиқали драмасини ёзган. Уруш йилларида чиққан «Сен нима қилдинг?» (1942), «Шоҳиста» (1944), кейинроқ нашр этилган «Ширин кун» (1947) ва «Улуғ шаҳар» (1951) тўпламларида уруш воқеалари акс этган. Уруш давридаги болалар ҳаёти ҳақидаги «Бизнинг жангчи» (1942) ва «Гулхан» (1943) песалари Республика ёш томошабинлар театрида қўйилган.

Кейинги йилларда болалар учун «Бизнинг байрам» (1953), «Кўкбулоқ» (1957), «Оҳанграбо» (1959), «Дастёр қиз» (1961), «Озода» (1964) китобларини чиқарган. Халқ эртакларини қайта ишлаб «Думсиз тулкилар», «Уч тулки», «Тулки билан турна» каби эртаклар яратган, «Айиқ», «Бузоқ», «Тойчоқ», «Митти» сингари ўйинчоқ ва жониворлар ҳақидаги қисқа шеърлар ёзган. «Далада байрам» (1954) комедияси кўплаб театрларда саҳналаштирилган. Бастакор Собир Бобоев билан ҳамкорликда З. Фатхуллин билан ёзилган «Ватан ишқи» мусиқали драмаси (1958, Муқимий номидаги мусиқали театр) ва «Икки билагузук» мусиқали комедияси (1962) яратилган. 1967-йилда «Ёрилтош» либреттосини ёзган, у асосида Бобоев 1969-йилда болалар операсини басталаган.

Таржимон сифатида Илёс Муслим билан биргаликда С. Маршакнинг шеър ва эртакларини (1950) ўзбекчага ўгирган. Г. Х. Андерсен, Н. А. Некрасов, А. С. Пушкин, Л. Толстой, Б. Житков, С. Михалков, А. Барто асарларини, Б. Горбатовнинг «Бўйсунмаганлар» (1953), В. Осееванинг «Васёк Трубачев ва унинг ўртоқлари» (1954) қиссаларини, К. Чуковскийнинг «Доктор Войжоним» («Доктор Айболит») эртагини (1966) таржима қилган.

1964–1972-йилларда Ўзбекистон Ёзувчилар уюшмасида адабий маслаҳатчи бўлиб ишлаган. 1972-йилда «Ўзбекистон ССРда хизмат кўрсатган санъат арбоби» унвонига сазовор бўлган. Шукур Саъдулла 1972-йил 14-сентабрда Тошкентда вафот этган. 1973-йилда Собир Бобоев «Ватан ишқи» асосида унинг ва З. Фатхуллиннинг либреттоси билан «Фидойилар» операсини яратган.